الرئيسية / أقلام / جديد الفنان الملتزم لزهر الضاوي: بِعْنا..”رادسْ”!!!

جديد الفنان الملتزم لزهر الضاوي: بِعْنا..”رادسْ”!!!

لزهربعنا “رادس”..بعنا “رادس”..

بمدَارحها..بكراسيها..
و”الملعب” ..و”العشب الأخضر”..
“مبروكين..على شاريها “…
بعنا “الدّخلة”..وبعنا “الخرجة”
بعنا “الشماريخ”..و”الهَرجة”
بعنا “الجو”..وبعنا “الفُرجة”..
و “لَهداف “الّلي تمَركوا فيها…
يا تونس شوفي آشكون خطبك..
“يا عروسة…ربّي يهنّيها ”
جاي من الابعاد..”يحبك”
“ما نعرّس -قال – الّا بيها ”
“عريسك”..صيّاد ” الحبارى “..
ولّا “الحبارى”..نسيتيها..؟؟
وهزّك ليه “شاكر” ..في شكارة
طابع “خزندار “..عليها..!!
………………………
اليوم راحت منا “المسميّة ”
واحنا اللي سلمنا فيها..
وب”الصكوك الاسلامية ”
جتها الصّكّة..بين عينيها…
قعَدت نخمّم..مُخيّ حابس..
قالولي ما تخمّم فيها..
غدوة من بنزرت لقابس
تنبيعوها …بُامّاليها..
……………………….؟؟؟
ابكوا معايا…وزيدوا ابْكُوا
على تونس ما صايِرْ فيها ..!!

– قفصة30/ 10/ 2015 –

اضف رد

لن يتم نشر البريد الإلكتروني .

إلى الأعلى