لزهر الضاوي في قصيد مؤثّر حول ذبح الطفل الراعي بسيدي بوزيد: “كلام الرّاعي”

يمّة..وَعلاش حَياتي.. وفت الّليلة..؟؟
وعلاش حكم الله ..في تنزيلَه..
يحكم عليّ نبات..- وانا وليدك-
راسي في “جلمة”..وجثتي في “مغيلة”؟؟
وعلاش حكم الله ..هكّة قاسي..
وباسمك ياربّي..جزّروني الليلة..
وانا صغير..و”بابا “ما هوعاصي..
ودافعت عَلى المعزات..قسم العيلة..؟؟
..وعلاش حكم الفقري..ديمة مباصي..
وللفقر ما لقيناش حتى حيلة..؟؟
وظنيت عمري يطول….- موش قُلتيلي- ..؟
“عمر الشقاء أيّامو راهي طويلة”..
..وانا مع المعزات ..هكّة سارح..
جوني الذيوبة..باللحي طويلة..
وب”سيف عُقبة”..قزّمولي راسي..
تيجيك في ” ساشي “..ما تشوفيلَه..
وقلبي في جسمي قعَد..فيه إحساسي..
عند ” الزّروق”..يا أمّيمتي بَرّيله..
وضُمّيني عند الصّبح..تجيك أنفاسي..
وليدك في حضنك..ياما غنّيتيله..!!
……………………..…..
..ونعرف غزير الدمع..موش تيواسي..
لكن.. بدمعك.. طالب “التغسيلة “..!!