لزهر الضّاوي: “شاهي نولّي…معتمد..!! “

نشر الفنان الملتزم لزهر الضاوي قصيدته الجديدة من وحي التعيينات الأخيرة في سلك المعتمدين تحت عنوان “شاهي نولّي..معتمد..!! ”، و هذا نصها: –

( من وحي التسميات الأخيرة في سلك المعتمدين ):

شاهي نولّي معتمد..شاهي نولي معتمد..
معتمد نحب نولّي..وما سمّاني حتى حد..؟؟!!
..نولي معتمد ع”الصحراء”..
نرجّعها سواني وجرَد..
ولّا على “تالة”..يحطّوني..
ندفّيها..ما عاد تبرد..!!
واذا سمّوني على “نبّر”..
على “مَلّاق”..نعلّي السّد..
ولّا في “حيّ التضامن”..
إنّحّي الزبلة للأبد..!!
…آما غير بركة سمّوني.
.يا حكومة .. “الأسد “..
…وقدّمت “الدّوسي”..قلتلهم
نخدم حتى نهار الأحد
ونعاون عمّال البيئة
“بالبالة”..من غير عُقَد
..في سبيل بلادي نضحّي..
آنا راني مستعد..آنا راني مستعد..
…………………
…لكن نلقاهم طفّوني
وما بعثولي حتى رد
..بل ب”الكفاءة “..تهموني
والتعاطف..مع “الوطد”..؟!!
وقالولي ماكش “خَليقة ”
وماكش موشّم عاليد..؟!
واسمك غايب ع”التجمّع”..
لا في الأمس ولا في الغد..
ولا ضامن فيك “الغنوشي”
ولا “السبسي”..ولا حتى حد
..تفضّل خويا لمّ أوراقك..
سامحنا..وهيّا تجبّد..
أنت الظّاهر ماكش قاري
وجاهل تاريخ البلد..
ولّا راك ما كنتش تطلب
لا “عمدة” ولا “معتمد”
وها “التركة” راي “للقوّادة”
موروثة ” أبًا عن جد”!!
……………
هيّا ازرب وابتعد..
هيّا ازرب…………………….وابتعد …!!!!!!

لزهر الضاوي